काठमाडौँः प्रधानमन्त्री बालेन शाहले रसुवाको भोटेकोशी नदीमा आएको विनाशकारी बाढीपछि सिर्जित परिस्थितिबारे तीनवटै सुरक्षा निकायका प्रमुखसँग उच्चस्तरीय छलफल सुरु गरेका छन् ।
गत भदौ १० गते भोटेकोशी नदीमा आएको बाढीबाट ठूलो जनधनको क्षति भएपछि खोजी, उद्धार, राहत वितरण तथा घाइतेको उपचारलगायतका काम भइरहेका छन् । यही अवस्थाबारे विस्तृत जानकारी लिन र आगामी कार्ययोजनाका विषयमा आवश्यक निर्देशन दिन प्रधानमन्त्री शाहले सुरक्षा प्रमुखहरूसँग छलफल थालेका हुन् । सिंहदरबारस्थित प्रधानमन्त्री तथा मन्त्रिपरिषद्को कार्यालयमा अहिले नेपाली सेनाका प्रधानसेनापति अशोकराज सिग्देलसँग प्रधानमन्त्री शाहको छलफल भइरहेको उनको सचिवालयले जनाएको छ ।
छलफलका क्रममा बाढी प्रभावित क्षेत्रमा भइरहेको खोज तथा उद्धार अभियान, सुरक्षाकर्मीको परिचालन, राहत तथा उद्धार सामग्रीको व्यवस्थापन, प्रभावित नागरिकको उद्धार र उपचारलगायतका विषयमा प्रधानसेनापति सिग्देलबाट प्रधानमन्त्री शाहले विस्तृत ब्रिफिङ लिने बताइएको छ । प्रधानसेनापति सिग्देलसँगको छलफल सकिएपछि प्रधानमन्त्री शाहले नेपाल प्रहरीका महानिरीक्षक दानबहादुर कार्की र सशस्त्र प्रहरी बल, नेपालका महानिरीक्षक नारायणदत्त पौडेलसँग पनि छुट्टाछुट्टै छलफल गर्ने कार्यतालिका रहेको सचिवालयले जनाएको छ ।
तीनवटै सुरक्षा निकायबाट बाढी प्रभावित क्षेत्रमा भइरहेको खोज, उद्धार तथा राहतसम्बन्धी पछिल्लो अवस्थाबारे जानकारी लिएपछि प्रधानमन्त्री शाहले थप प्रभावकारी रूपमा सुरक्षा जनशक्ति परिचालन र उद्धार तथा राहत कार्य अघि बढाउन आवश्यक निर्देशन दिने तयारी गरेका छन् ।
