काठमाडौँः रसुवाको बाढीपहिरोका कारण सम्पर्कविहीन भएका माथिल्लो त्रिशूली–३ ‘बी’ जलविद्युत् आयोजनाका १९१ जना कर्मचारी तथा श्रमिकको खोजी तथा उद्धार कार्य जारी छ । आयोजनास्थलमा तीनवटा साना एस्काभेटर परिचालन गरी पहिरोले पुरिएको क्षेत्रमा भग्नावशेष र ठूला ढुंगा हटाउने काम भइरहेको छ ।
तर, अहिलेसम्म भवन वा मानिस रहेको कुनै संरचना फेला परेको छैन । आयोजनाकी उपनिर्देशक लीला अर्यालका अनुसार प्रभावकारी रूपमा भग्नावशेष हटाउन ठूलो एस्काभेटर आयोजनास्थलमा पुर्याउन आवश्यक छ । पहिरोका कारण सडक अवरुद्ध भएकाले ठूलो मेसिन लैजान कठिन भइरहेको छ । सडक खुलाउन डाँडा काट्ने काम भइरहेको छ भने विकल्पका रूपमा एस्काभेटरलाई पार्ट–पार्टमा छुट्याएर घटनास्थलमा पुर्याई पुनः जडान गर्ने तयारीसमेत भइरहेको छ ।
खोजी तथा उद्धारमा नेपाली सेना, सशस्त्र प्रहरी र आयोजनाको टोली परिचालित छन्। साथै, अडिट टनेलभित्रका अवरोध हटाएर अडिट–२ तर्फबाट समेत भग्नावशेष हटाउने योजना बनाइएको छ ।
