काठमाडौँः रसुवामा आएको विनाशकारी बाढीका कारण ज्यान गुमाउनेको संख्या ४६९ पुगेको छ । गृह मन्त्रालयअन्तर्गतको विपद् पूर्वतयारी तथा प्रतिकार्य शाखा (NEOC) ले आज बिहान ७:३० बजे सार्वजनिक गरेको पछिल्लो विवरणअनुसार ९७७ जना अझै बेपत्ता छन् ।
फेला परेका शवमध्ये सबैभन्दा धेरै चितवनमा १७८ जना रहेका छन् । जिल्लागत विवरणअनुसार नवलपरासी पूर्वमा ११०, गोरखामा ४४, नुवाकोटमा ३७, धादिङमा ३३, तनहुँमा २८, नवलपरासी पश्चिममा २७ र रसुवामा १२ जनाको शव फेला परेको छ । विपद्मा परी ७३ जना घाइते भएका छन्, जसमध्ये रसुवामा मात्रै ४३ जना छन् । हालसम्म ३ हजार २५३ जनाको जीवितै उद्धार गरिएको मन्त्रालयले जनाएको छ ।
बेपत्ता ९७७ जनामध्ये ५१७ जना विदेशी नागरिक, विदेशमा बसोबास गर्ने नेपाल भ्रमणमा आएका १२७ जना नेपाली, नेपाली सेनाका ४५, नेपाल प्रहरीका २८ र सशस्त्र प्रहरीका १३ जना सुरक्षाकर्मी रहेका छन् । यस्तै रसुवाका १६१ र मकवानपुरका ६६ स्थानीय तथा भन्सार कार्यालयका १५ र अध्यागमन कार्यालयका ४ कर्मचारी पनि सम्पर्कविहीन छन् ।
उद्धार तथा विपद् प्रतिकार्यका लागि देशभर ९ हजार ४०५ सुरक्षाकर्मी परिचालन गरिएको छ । नेपाली सेनाका ४ हजार २४३, नेपाल प्रहरीका ३ हजार ३१८ र सशस्त्र प्रहरीका १ हजार ८४४ जना सुरक्षाकर्मी खटिएका छन् । उद्धारका लागि नेपाली सेनाका ६ र निजी क्षेत्रका ९ गरी १५ वटा हेलिकप्टर प्रयोग भइरहेका छन् ।
