काठमाडौँः रसुवाको खाल्टेमा आएको बाढीमा आमालाई गुमाएकी पाँच वर्षीया इशारा तामाङ अहिले त्रिवि शिक्षण अस्पतालमा उपचाररत छिन्। बाढीको भेलमा परेर जालमा अल्झिएको अवस्थामा उद्धार गरिएकी इशारा पेडियाट्रिक सर्जरी वार्डमा छिन् ।
आँखा खोल्नेबित्तिकै उनले आफ्नो नाम ‘इशारा तामाङ’ बताएकी थिइन् । त्यसैबाट उनको पहिचान खुलेको हो । उनले बाढी आएको बेला आफू आमासँगै रहेको र भेलले आमालाई बगाएको बताएकी छन् । ‘ममीलाई बगायो । म हाम फालेर अघि बढ्दा जालीमा अड्किएँ,’ उनले चिकित्सकलाई भनेकी छन् । इशाराको शरीरमा चोटपटक छ भने बाढीको त्रासले उनी मानसिक रूपमा पनि प्रभावित छिन्। उपचारका क्रममा उनको हेरचाह गर्ने परिवारका कोही अस्पतालमा छैनन् ।
त्यसैले अहिले डाक्टर, नर्स तथा अन्य स्वास्थ्यकर्मीले नै उनलाई आफ्नै बच्चाजस्तै हेरचाह गरिरहेका छन् । अटेन्डेन्ट पवित्रा मगरका अनुसार इशारालाई अस्पताल ल्याउँदा शरीरमा लगाउने कपडासमेत थिएन । स्वास्थ्यकर्मीहरूले नै कपडा, खाना र आवश्यक सामग्रीको व्यवस्था गरेका छन् । उपचारका क्रममा उनको कानमा एउटा सानो सुनको मुन्द्रा भेटिएको छ । परिवारको पहिचान नखुलेसम्म सुरक्षित राख्न उक्त मुन्द्रा अस्पतालले जिम्मा लिएको छ । इशाराले आफ्ना बुवा काठमाडौंमा रहेको बताएकी छन् ।
अहिले सामाजिक सञ्जालमार्फत उनका बुवाको खोजी भइरहेको छ । उनी रसुवाको उत्तरगया गाउँपालिका–१, सातबिसेस्थित श्री रामचन्द्र माविमा अध्ययनरत रहेको बताइएको छ । आमा बाढीमा हराइन्, बुवा सम्पर्कविहीन छन्। पाँच वर्षीया इशारा भने अस्पतालको शय्यामा आफ्ना मान्छे आउने आशामा छिन् ।
