काठमाडौँः अर्थमन्त्री डा. स्वर्णिम वाग्लेले बन्द तथा समस्याग्रस्त सरकारी उद्योगहरू सरकार आफैँले सञ्चालन नगरी निजी क्षेत्रलाई हस्तान्तरण गर्ने नीति रहेको बताउनुभएको छ ।
नेपाल आर्थिक पत्रकार समाज (सेजन) को २८औँ साधारणसभामा बोल्दै अर्थमन्त्री वाग्लेले गोरखकाली रबर, हेटौँडा सिमेन्ट र उदयपुर सिमेन्टलगायत सात सार्वजनिक उद्योगको विस्तृत मूल्यांकन (डीडीए) सम्पन्न भएको जानकारी दिनुभयो ।
उहाँका अनुसार दशकौँदेखिको ऋण तथा आर्थिक दायित्व फरफारक गरी सरकारी जग्गासम्बन्धी विवाद नआउने व्यवस्था मिलाएर उद्योगहरूलाई ‘अपरेसनल लिज’ मोडलमा निजी क्षेत्रलाई सञ्चालन गर्न दिइनेछ । सरकारले निजी क्षेत्रका लागि निष्पक्ष र स्वच्छ प्रतिस्पर्धाको वातावरण बनाउन काम गरिरहेको पनि उहाँले बताउनुभयो ।
