काठमाडौँः नेपाल विद्युत प्राधिकरणले टेकु सबस्टेसनमा प्राविधिक काम गर्नुपर्ने भएकाले काठमाडौंका विभिन्न क्षेत्रमा विद्युत आपूर्ति प्रभावित हुने जनाएको छ ।
प्राधिकरणका अनुसार असोज ४ गतेदेखि असोज १४ गतेसम्म विभिन्न फिडरमार्फत वितरण हुने विद्युत सेवा निर्धारित तालिकाअनुसार अवरुद्ध वा प्रभावित हुन सक्नेछ । लप्सीफेदी तथा चाँगुनारायण सबस्टेसन निर्माण आयोजनाअन्तर्गत टेकु सबस्टेसनको ११ केभी प्यानलमा रहेका पुराना रिले हटाएर नयाँ रिले जडान गरिनेछ ।
साथै रिले रेट्रोफिट तथा एसएएस (सबस्टेसन अटोमेसन सिस्टम) जडान र परीक्षणको कामसमेत हुनेछ । यस क्रममा १३२ केभी टेकु सबस्टेसनबाट आपूर्ति हुने विभिन्न फिडर प्रभावित हुने भएकाले ती फिडरअन्तर्गतका काठमाडौंका विभिन्न क्षेत्रमा विद्युत सेवा अवरुद्ध वा प्रभावित हुन सक्ने प्राधिकरणले जनाएको छ । तर सबै क्षेत्रमा एकै समयमा विद्युत बन्द हुने छैन। प्रभावित फिडर र कामको प्रकृतिअनुसार विद्युत आपूर्ति बन्द हुने समय फरक–फरक हुनेछ ।
प्राधिकरणले प्राविधिक कामका कारण उपभोक्तालाई पर्न सक्ने असुविधाप्रति क्षमा माग्दै निर्धारित समयमै काम सम्पन्न गर्न सहयोग गर्न आग्रह गरेको छ । नयाँ रिले जडान, रेट्रोफिट तथा एसएएस परीक्षणपछि विद्युत आपूर्ति नियमित हुने प्राधिकरणले जनाएको छ ।
प्रतिक्रिया ०
यो समाचारबारे तपाईंको धारणा लेख्नुहोस्। सभ्य र सम्मानजनक भाषा प्रयोग गर्नुहोस्।
अहिलेसम्म प्रतिक्रिया आएको छैन। पहिलो प्रतिक्रिया तपाईंको होस्।